Zustupf 2020
1. Liebi Lüt vo noch und au vo wiit
Hüt isch wider einisch Sännächilbizyt
Vo Härzä tüemer üch im Tal begrüessä
Und mit dem Alass hiä üch z‘ Läbä no versüessä
2. Über Land und Lüt im Tal äs weis scho jedä
Ä Witz, ä Gschicht oder susch öppis z’redä
Äs Original hets gäh, är isch doch gsi ä chli ä Ruuchä
Am Reporter hed är gseid, dich chönnti mäni wenig bruuchä
3. Ä Uuszyt näh, vo dännä gah vom Arbätstag
Das duet a jedäm Älpler guät, das isch kei Frag
Im Flug gaht der Abig ufem Hotelbalkon durä
no schöner wärs wenn doch kei Bläser me dät surä
4. Adr letschtä Sännächilbi isch doch gsi ä Wagä
Wo adr Umzugsleitig schwär isch glägä ufem Magä
Dr Umzug isch wägä dem dä grüüseli cho is stockä
Meh Chäs verteile het är wellä, nüd z letscht druf obä hockä
5. Vo Amtes wägä wends jetz durästierä
Das mä z Chliveh au i beidi Ohrä muäs markierä
Beschlossä wordä isch das nur am Tisch
Diä Nächschtä Opfer sind dä dänk no d‘Hüender und au d‘Fisch
6. D‘Horärank Buustell isch ufem Nossä ussä zimli usgsetzt
Grad zwei Rotliecht hends anä gstellt und midenand vernetzt
Scho mängä het bi Rot de z Gas no gleitig durätrückt
So hets äbä als blockiert – vi artig meh hets grückt
7. Durä Axa inä hets äs paarmal gmacht äs bitzeli wumm
Und scho gits druus äs uusinnigs Politikum
Gschaffäd wird grad Tag und Nacht der Fels isch gar ä ruuchä
Wenigschtens hends a dä Bägger d’Liechter einisch chönnä bruuchä
8. Dr Trump as WEF gah oder gar für 80 Mio. dr Chopf abschlah
Das isch gsi äs riisä grosses Thema
Eis isch sicher sini Amtsduur isch gli durä
Ä chächä Vorsprung hend dä mier mit üsnä Trochemuure.
9. Am Lanzig hed dr Fachmaa i Sachä Wild
Überä Schadä bim Buur sich gmacht äs Bild
Ä Huufä Gras heigid d Hirschä schono gfrässä
Aber das täg au z‘Wachstum förderä, das dörf me nüd vergässä
10. Z redä het si grad ä Huufä gäh
Üsi Wildwarnalag idr Hesigä
Einä het sich dänkt, är täg sich ghörig drgägä wehrä
Und isch diä Alag churzerhand gah z Bodä zehrä
11. D ARA sig dä nümmä ufem nüüschtä Stand
Z viel Schadstoff gand diusä, diräkt a Muotastrand
Drum müemer gar nüd lang me beitä
Bis mer chönd diä Sach dä Schwyzer usä leitä
12. Ä Jahrhundert Stoosbahn z‘buuä isch nä glungä
Vo derä wird sogar z‘Korea änä äs Loblied gsungä
Wänd dobä bisch muesch ä chli lang uf z Trinkä beitä
Z‘Wasser tüends etz grad äno is Schlattli apä leitä
13. D Stoosbahn hed etz gross no einisch müessä investierä
Dr Schnee zum Trassee usblasä wends probierä
Fürä Rüümigserfolg sig das dr richtig Schlüssel
Uusgseh duet diä Maschinä wenä Elefant mit zwe Rüssel
14. Äs gsunds Klima wär ja scho no guät, das dänkt no mängä
Bis ärs dä bim nächschtä, das gönn ich etz a mier, wider tued verdrängä
Äs wär nur schön wenn jedä sich dät interessierä dra
Was mer üsnä Jungä fürnä Wält wend hinderlah
15. Ä sonä Wolf sig doch scho äs härzigs Tier
Dänkt mängä vorem Färnseh bimä Bier
Doch wend einisch grissni Schaf hesch müessä gseh
Duet dis Härz bis ganz wyt inä weh
16. Äs Huus a beschter Lag, äs isch no eigenartig
Hed erläbt ä chli ä mangelhafti Wartig
Äs Bett staht no bereit für Schlaf, ä gsundä und ä langä
Wänds wotsch bruuchä darfsch eifach nüd grad z hüntsch am Läbä hangä
17. Der Teufbach isch scho mängisch gsi ä wildä Chogä
Scho mängä Stei isch über d’Brüggä durä gflogä
Ä Amplä wird gmontiert, äs wird nüüd am Zuefall überlah
Wäner chunnd so sötsch bimeid dä d’Schüeli bundä ha
18. D‘Pragelstrass diä wird etz frisch gsaniert
Diä wos betrifft diä sind fruschtriert
Flätt gsperrt isch si punkt eis und bis am vieri
Äs sig ordeli gliich we hüntsch das äs prässieri
19. Au i üser Region isch dr Prieschter Mangel gross
Drum gits halt i weniger Mässä ä chli meh äs Knoos
Mit Glassäheit düä mer doch dem Problem begägnä
Dr Herrgott duet üs sicher au usset dr Chilä sägnä
20. Was wär ächt z Muetital ohni üsi Wätterfrösch
Äs wär schier wenä Wäschmaschinä ohni Wösch
Wo si ufträtit chasch es gmüetlich ha und lachä
Äs isch nä gratä z Muetital bekannter z machä
21. Kreativ isch z Muetitaler Gwärb dä scho
Viel Lüt chönd schaffä und hend dr Loh
Im Ried vor gits sogar sid nüü ä Schuppä
Det chasch chaufä äso füdläblutti Puppä
22. Hends gmüätlich etz no mängi Stund
Dr Morgäd ja dä vonäleinig chund
Ä Gueti Heicher, chömid zuenis sobald ier hend drwil
Vo Härzä sind willkommä ier bi üs dä alläwil
